El Muséu Exipciu del Cairu, agora nomáu tamién Muséu d'Antigüedaes del Cairu, ye un muséu dotáu d'unos vastos fondos arqueolóxicos exipcios de toda clase, que s'atopa situáu na capital, El Cairu. Dependiente del Conseyu Supremu d'Antigüedaes, organismu gubernamental encargáu del patrimoniu hestóricu del país, que depende a la so vegada del Ministeriu de Cultura.
Anque los oxetos más apreciaos son los rellacionaos con Tutankhamon (especialmente la so máscara d'oru), el muséu poseye oxetos de toles dinastíes, de la más distinta naturaleza, dende oxetos d'usu diariu a les momies de faraones y altos personaxes. En total, los oxetos espuestos calcúlense en 136.000 (otres fontes indiquen 120.000), otros varios centenares de miles tán conservaos n'almacenes.
El muséu foi creáu en 1835 nun intentu del gobiernu por detener la exportación incontrolada de tou tipu d'artefactos antiguos. Abrió les sos puertes en 1858 coles colecciones recoyíes por Aguste Mariette, arqueólogu francés al serviciu d'Isma'il Pasha. Nel 1880 el muséu taba situáu nel mesmu llar d'Isma'il Pasha en Giza. En 1900 el muséu alquier la so actual sede, un edificiu d'estilu neoclásicu, construyíu a posta, na Plaza Tahrir, nel centru del Cairu.
La Sala de les momies, que contién 27 momies reales d'época antigua, foi pesllada al públicu en 1981, por orden del entós presidente exipciu, Anwar Sadat. Dende 1985 foi reabierta con una seleicción de momies de reis y reines del Reinu Xoven, de les que sólo ye visible'l rostru.
