Los Montes Wudang (Chinu simplificáu: 武当山; Chinu tradicional: 武當山; Pinyin: Wǔdāng Shān), tamién conocíos como Wu Tang Shan o simplemente Wudang, son un pequeñu cordal na parte noroeste de la provincia china de Hubei, al sur mesmu de la ciudá de Shiyan.
Nos mapes chinos, el nome "Wudangshan" (武当山) aplícase tanto al cordal enteru (que va d’este a oeste a lo llargo de la faza sur del valle del ríu Hanshui, cruciando dellos arrabaldes de la ciudá-prefeutura de Shiyan), como al pequeñu conxuntu de picos allugaos nel sodistritu Wudangshan del conceyu Danjiangkou, de Shiyan. Ye la última área específica conocida como centru taoísta.
Los mapes modernos amuesen como picu cimeru al Wudang Shan propiamente dichu, con un altor de 1.612 metros; ensin embargu per tol cordal Wudangshan hai altores dalgo mayores. Hailos que consideren a los Montes Wudang como un apéndiz del cordal de los Montes Daba, que ye la principal cadena de montes del oeste d'Hubei, Shaanxi, Chongqing y Sichuan.
Antaño los montes de Wudang teníen nomadía polos munchos monesterios taoístes que s’atopaben pellí, célebres como centros académicos pa la investigación, deprendimientu y práutica de la meditación, artes marciales chines, Medicina Tradicional China, agricultura taoísta y artes rellacionaes. Tan ceo como na Dinastía Han del Este (25-220 d.C.), los montes llamaron l’atención del emperador. Na Dinastía Tang (618-907) construyóse’l primer sitiu de cultu —el Templu de los Cinco Dragones—. Dellos monesterios sufrieron daños cuando la Revolución Cultural de 1966-1976, pero la popularidá de los montes Wudang xorreció más tarde cola llegada de turistes de toles partes de China y l’estranxeru per aciu de la so llocalización acionada y interés históricu. Los monesterios y construcciones foron nomaos Patrimoniu de la Humanidá de la Unesco en 1994. Los palacios y templos de Wudang, que foi organizáu como complexu na Dinastía Ming (sieglos XIV al XVII), inclúin construcciones taoístes de feches tan tempranes como’l sieglu VII. Wudang representa los estándares cimeros del arte y arquiteutura chinos nun periodu de cuasi 1000 años. Ente los templos famosos tán la Sala Dorada, el Templu Nanyan y el Templu de la Nube Púrpura.
El 19 de xineru de 2003, el Palaciu Yuzhengong de los Montes Wudang, con 600 años d’antigüedá, foi afaráu por una quema accidental causada por un emplegáu d’una escuela d’artes marciales. El fueu entamó nel antepar, reduciendo a cenices les tres dependencies con una estensión de 200 metros cuadraos. Una estatua de Zhang Sanfeng recubierta d’oru, que se llevantaba en Yuzhengong, fuera treslladada a otru edificiu xusto enantes de la quema, escapando asina d’una destrucción segura.
Diz la lleenda que Zhang Sanfeng (张三丰) ye’l creador del Wudangquan en xeneral y del Taijiquan en concreto, al paecer inspiráu por una llucha que presenciara ente una pega (o quiciabes una grulla blanca) y una víbora.
Dende’l sieglu XX, y siguiendo a Sun Lutang, el Taijiquan, el Xingyiquan y el Baguazhang considérense estilos de Wudang. Acordies con esta clasificación, el tornéu nacional d’artes marciales del Institutu Central Guoshu celebráu en 1928 dixebró a los participantes en "Shaolin" y "Wudang".
Del 28 d’ochobre al 2 de payares de 2008 tuvo llugar nos Montes Wudang el tercer Festival biañal de Wushu.