Córdoba ye una ciudá d'Andalucía, España, capital de la provincia homónima, allugada nun afondamientu a orielles del ríu Guadalquivir y al pie de Sierra Morena. El so cascu hestóricu declaróse Patrimoniu de la Humanidá pola UNESCO en 1984. Ye candidata a Capital Europea de la Cultura pal añu 2016. Anguaño tien una población de 322.867 y ocupa una estensión de 1.252 km2.
Córdoba foi el llugar de nacencia de tres grandes filósofos: l'estoicu romanu Séneca, el musulmán Averroes y el xudío Maimónides. Tamién ñacieron en Córdoba el precursor de l'aeronáutica Abás Ibn Firnas, los poetes Lucano, Xuan de Mena y Lluis de Góngora.
Foi capital de la provincia romana Provincia Hispania Ulterior Baetica (Bética), dómina de rellumu, na que aportó a cuntar con tantes edificaciones lúdiques como la mesma Roma, y nella xorrecieron importantes personaxes como'l filósofu Luciu Anneu Séneca, oradores como Marcu Anneu Séneca y poetes como Lucano. Postreramente foi llugar importantes na provincia de Spania del Imperiu Bizantín y durante'l periodu visigóticu. Algamó la capitalidá de nueu nel Emiratu Independiente y el Califatu Omeya d'occidente, dómina na qu'algamó'l so mayor apoxéu, aportando a tener ente 250.000 y 500.000 habitantes, siendo nel sieglu X una de les ciudaes más grandes del mundu, asina como un gran centru cultural, políticu ya económicu. D'esta dómina ye ún de los sos monumentos más afamaos: la Mezquita de Córdoba (anguaño Catedral).