La Biblioteca de Celsu, n'Éfeso, Asia Menor (anguaño parte de Turquía), foi construyida n'honor a Tiberiu Xuliu Celsu Polemeanu (completada nel añu 135) pol fíu de Celsu, Tiberiu Xuliu Águila Polemeanu (cónsul, añu 110). Celsu fuera cónsul nel añu 92, gobernador d'Asia nel añu 115, y un ciudadanu romanu de la rexón popular y adineráu.
La biblioteca construyóse p'almacenar 12 000 rollos y pa sirvir como tumba monumental pa Celsu. Nun yera costume que daquién se fixera soterrar nuna biblioteca o inclusive dientro de les llendes d'una ciudá, lo que foi un honor especial pa Celsu.
L'edificiu tien importancia como unu de los escasos restos de lo que yera una biblioteca nos tiempos de l'anticua Roma. Tamién ye un exemplu de como les biblioteques públiques nun yá construyíense na mesma Roma, sinón a lo llargo de tol Imperiu romanu.
Ente los añu 1970 y 1978 realizóse una restauración importante qu'anguaño se considera como abondo fiel al edificiu históricu, nel que la fachada frontera sirve d'exemplu d'arquitectura romana pública, ya inclusive sirve d'exemplu pa otres biblioteques peor calteníes d'otres zones del imperiu, porque ye posible que s'allugaren colecciones de lliteratura n'otres ciudaes romanes pa beneficiu de los estudiosos y de los viaxeros.
L'edificiu ye de planta única que da al este pa que, como dixo Vitruviu, beneficiara a los madrugadores. Ta construyida sobre una plataforma sobre nueve gradies, y con trés accesos. La entrada central ye más grande que les dos llaterales y toes elles tán afataes con ventanes asitiaes sobre'l cargaderu.
La biblioteca foi amburada polos godos nel 263.
